Энэхүү өрөмдлөгийн ажлын гол зорилго нь Norrabees Mine уурхайн шинэ ашигт малтмалын нөөцийг тогтоох явдал юм. Үүний хүрээнд шинэ бүтэц, геологийн зураглалын мэдээллийг ашигласнаар Norrabees пегматитын уналтын чиглэлийн өмнөх ойлголтыг бүрэн өөрчилжээ.
Мөн компани нь сподумен агуулсан эрдэсжилтийн гадаргуугийн шинэ үргэлжлэлийг илрүүлсэн бөгөөд өмнөх өрөмдлөгөөр 32.7 метр зузаанд 1.09%-ийн литийн исэл (Li₂O) агуулга илэрсэн байна.
Lithium Africa компани овоолгын дээжийг дахин шинжлүүлэх хөтөлбөрийн лабораторийн үр дүн, Өмнөд Африкийн Ашигт малтмал ба газрын тосны нөөцийн хөгжлийн тухай хуулийн (MPRDA) 11-р хэсгийн зөвшөөрлийг хүлээж байгаа бөгөөд өрөмдлөгийн ажлыг дэмжих уурхайн кэмпийн шинэчлэл 7-р сар гэхэд дуусахаар төлөвлөгджээ.
Мөн компани төслийн одоогийн сподумены овоолгын дахин дээжлэлт болон борлуулалтын үйл явцыг эцэслэж байгаа бөгөөд Norrabees дахь 30,000 тонн сподумены овоолгыг худалдах боломжийг үргэлжлүүлэн судалж байна. Худалдааны компаниуд болон стратегийн салбарын оролцогчдыг багтаасан хэд хэдэн талууд нарийвчилсан шалгалт (due diligence) хийж байгаа аж.
Lithium Africa-ийн гүйцэтгэх захирал Tyron Breytenbach:
“Сүүлийн улиралд Springbok төсөл маш хурдтай урагшиллаа. Бид Norrabees системийн геологийн бүтцийн талаарх ойлголтоо шинэчилж, баг болон тоног төхөөрөмжөө дайчилж, шинэ эрдэс баялгийн нөөц тогтооход чиглэсэн томоохон өрөмдлөгийн хөтөлбөрөө бэлтгэсэн. Мөн овоолгын эдийн засгийн эргэлтэд оруулах боломжуудыг үргэлжлүүлэн үнэлж байна” гэжээ.
1,675 км² талбай бүхий Springbok төсөл нь стратегийн өндөр ач холбогдолтой гэж үзэгдсэн бөгөөд 50 км-ээс урт үргэлжлэх, өмнө нь төдийлөн анхаарал татаж байгаагүй пегматитын бүсийг хамардаг. Тус бүсэд сподумен агуулсан 40 мэдэгдэж буй пегматит илэрц байдаг ч зөвхөн хоёрт нь л өмнө нь өрөмдлөг хийсэн байна.
Түүнчлэн тус төсөл нь бүрэн зөвшөөрөлтэй, жижиг хэмжээний эхлэлийн нөөцтэй бөгөөд гэрээт олборлолт эхлүүлж, богино хугацаанд орлого олох боломжтой гэж үзэж байна.
Lithium Africa компани өрөмдлөгийн ажлын гүйцэтгэгчээр Van Zyl Drilling компанийг сонгосон бөгөөд төслийн амжилтад чухал гэж үзсэн хэд хэдэн шинэ ажилтныг мөн томилжээ.
Үүнд:
- Одоогийн уул уурхайн дүрэм журмын дагуу уурхайд байнгын хяналт тавих мэргэшсэн уурхайн менежер,
- Springbok болон Steinkopf орон нутгийн иргэдтэй хамтын ажиллагааг хариуцах олон нийттэй харилцах менежер багтаж байна.
Мөн компани энэ сараас 6-р сарын эцэс хүртэл уурхайн талбай руу нэмэлт техникийн мэргэжилтнүүдийг үе шаттайгаар ажилд авч, томилон ажиллуулахаар төлөвлөж байна.
