Үйлдвэрлэлийн өсөлтөд уурхайн олборлолтын хурд нэмэгдэж, баяжуулах үйлдвэрийн боловсруулсан хүдрийн хэмжээ өссөн нь голлон нөлөөлсөн байна. Компанийн 2026 оны аравдугаар сарын 8-нд танилцуулсан үйлдвэрлэлийн тайланд дурдсанаар, Камоа-Какула цогцолбор хоёрдугаар улиралд 64,328 тонн борлуулах боломжтой зэсийн бүтээгдэхүүн үйлдвэрлэж байсан бол гуравдугаар улиралд энэ үзүүлэлт 76,401 тоннд хүрчээ. Үүнээс зэсийн баяжмал дахь зэсийн хэмжээ 68,188 тонн болсон нь өмнөх улирлын 61,134 тонноос 11.5%-иар өссөн үзүүлэлт юм. Харин 2025 оны мөн үед баяжмал дахь зэсийн хэмжээ 71,266 тонн байжээ. Иймээс нийт борлуулах боломжтой бүтээгдэхүүний үйлдвэрлэл улирлаар мэдэгдэхүйц нэмэгдсэн ч баяжмал дахь зэсийн үйлдвэрлэл жилийн өмнөх түвшнээс доогуур хэвээр байна.
Үйлдвэрлэлийн сэргэлтийн гол хүчин зүйл нь Камоа болон Канcоко уурхайн олборлолтын хурд нэмэгдсэн явдал байлаа. Тайлант улиралд эдгээр уурхайн олборлолтын хэмжээ сард 700,000 тонноос давж, өмнөх үеэс 30%-иар өссөн байна. Энэ нь жилийн тооцоогоор ойролцоогоор 8.5 сая тонн хүдэр олборлох хүчин чадалтай дүйцэх үзүүлэлт юм. Олборлолтын өсөлтөд нэмэлт уурхайн багуудыг ажиллуулж эхэлсэн, Камоа-1 далд уурхайд нэвтрэх шинэ гарц ашиглалтад орсон болон хүдрийн биетээс үйлдвэрлэлийн олборлолт эхэлсэн нь нөлөөлжээ. Мөн компанийн мэдээллээр, нэгдүгээр болон хоёрдугаар шатны баяжуулах үйлдвэрүүдийн боловсруулсан хүдрийн хэмжээ өмнөх улирлаас 30%-иар нэмэгдсэн байна. Үүнд Какула болон Канcоко уурхайгаас нийлүүлсэн хүдрийн хэмжээ өссөн нь голлон нөлөөлжээ.
Баяжуулах үйлдвэрийн технологийн шинэчлэл ч үйлдвэрлэлийн өсөлтийг дэмжсэн байна. Долоодугаар сард нэгдүгээр болон хоёрдугаар шатны баяжуулах үйлдвэрүүдийн шинэчлэлийн ажил дууссаны дараа гуравдугаар улирлын зэс ялган авалтын дундаж түвшин 89%-д хүрч, шинэ дээд үзүүлэлт тогтоожээ. Ivanhoe Mines 2026 оны борлуулах боломжтой зэсийн бүтээгдэхүүний үйлдвэрлэлийн төлөвлөгөөг 290,000–310,000 тонн хэвээр хадгалсан ч жилийн эцсийн гүйцэтгэл уг хүрээний доод хэсэгт ойр байх төлөвтэй байгааг анхааруулсан байна. Гуравдугаар улирлын эцэст компанийн зэсийн нөөц ойролцоогоор 43,000 тонн байжээ. Үүнд борлуулаагүй зэсийн баяжмал, хайлуулах үйлдвэрийн дамжлагад байгаа зэс болон борлуулахаар ангилсан өндөр агуулгатай зэсийн нарийн ширхэгт материал багтсан байна. Тус цогцолборын хайлуулах үйлдвэр жилд 500,000 тонн зэс боловсруулах зураг төслийн хүчин чадалтай боловч одоогоор хүчин чадлынхаа 60%-д ажиллаж байгаа аж. Иймээс олборлолт нэмэгдэхийн зэрэгцээ баяжмал боловсруулах, хайлуулах үйлдвэрийн хүчин чадлыг ашиглах түвшин нь цаашдын үйлдвэрлэлийн өсөлтөд чухал нөлөө үзүүлэх юм.
