Нийт 500 сая юаниас давсан хөрөнгө оруулалттай энэхүү төсөл нь тус ордын хүдрийн жилийн олборлолтыг 10 сая тонноос 15 сая тоннд хүргэж нэмэгдүүлэх зорилготой юм. Албан ёсоор төмрийн хүдрийг нэн тэргүүний зорилт гэж зарласан ч, энэхүү өргөтгөл нь Хятад улсын критикал газрын ховор элементийн нөөцийг бэхжүүлэх стратегийн алхам ажээ.
Төрийн өмчит "Baogang Group" нь одоо байгаа ил уурхайг өргөтгөх, уурхайн зүүн бүсийг шинээр ашиглалтад оруулахад хөрөнгө оруулалтыг чиглүүлж байна. Төслийн техникийн гол цөм нь автоматик (жолоочгүй) машин механизмыг удирдах 5G сүлжээг нэвтрүүлэх, уурхайн мөргөцөгийн налуугийн тогтвортой байдлыг хянах автоматжуулсан системийг хэрэгжүүлэх явдал юм байна.
Дижитал уул уурхай руу чиглэсэн энэхүү зорилго нь Хятадын өндөр технологийн илүү өргөн хүрээний дэвшлийг харуулж байгаа бөгөөд үүнтэй холбоотойгоор АНУ кибер аюулгүй байдлын үүднээс Хятадын зарим роботын импортыг хориглоод байгаа билээ.
Төслийн үзүүлэлт Одоогийн / Зорилтот түвшин
Жилийн үйлдвэрлэлийн хүчин чадал 10 саяас 15 сая тонн болж өсөх (+50%)
Хөрөнгө оруулалтын хэмжээ 500 сая юаниас дээш
Төмрийн хүдрийн нөөц ~600 сая тонн (Төмрийн дундаж агууламж 35%)
Дагалдах элементүүд Газрын ховор элемент, Ниоби, Сканди, Тори, Флюорит
Баян Овоогийн уурхайн үйлдвэрлэлийг нэмэгдүүлж байгаа нь АНУ-ын критикал ашигт малтмалын нийлүүлэлтийн сүлжээг төрөлжүүлэх гэсэн оролдлогод барьж буй шууд хариу үйлдэл гэж судлаачид тайлбарлаж байна. АНУ-ын Ерөнхийлөгч Доналд Трамп өнгөрсөн Баасан гарагт олон улсын болон АНУ-ын томоохон уул уурхайн болон критикал ашигт малтмалын салбарын компаниудын удирдлагуудыг хүлээн авч уулзалт зохион байгуулсан юм. Уг уулзалтын гол сэдэв нь критикал ашигт малтмалын салбарт АНУ-ын Хятад улсаас хамаарах хамаарлыг багасгах зорилтыг хэрхэн яаж хэрэгжүүлэх, ямар арга хэмжээ авах талаарх сэдэв байсан.
Баян Овоогийн ордын хүдэр нь полиметалл агуулдаг бөгөөд төмрийн үйлдвэрлэлийг нэмэгдүүлэхийн зэрэгцээ ниоби болон скандийг ялган авах нь баяжуулах үйл явцад маш өндөр нарийвчлал шаарддаг.
Мөн тус орд нь торийн элементтэй бөгөөд энэ нь ирээдүйд Хятадын дараагийн үеийн цөмийн реакторуудыг дэмжих боломжтой гэж үзэж байна.
