Дэлхий нийтээрээ сэргээгдэх эрчим хүчний цоо шинэ технологиуд руу гол анхаарлаа хандуулж байгаа хэдий ч уламжлалт нөөц баялгийг шинэчлэн ашиглах чиглэлд ч мэдэгдэхүйц ахиц дэвшил гарсаар байна. Тодруулбал, биотехнологийн салбарт гарсан нэгэн цоо шинэ нээлт нь нүүрсний давхаргаас гаргаж авах эрчим хүчний эх үүсвэр буюу метан хийн гарцыг нэмэгдүүлэх боломжийг олгож байна. Ингэснээр уламжлалт эрчим хүчний эх үүсвэрийг орчин үеийн зах зээлд өрсөлдөх чадвартай тоглогч болгон дахин байршуулах боломжтой юм.
Этанолын био-идэвхжүүлэлт нь нүүрснээс ялгарах метан хийн үйлдвэрлэлийг ердийн гарцаас 10.9 дахин ихэсгэдэг байна.
Нүүрсний давхаргын метан хийн системд этанол нь зөвхөн тэжээлийн суурь бодис төдийгүй био-идэвхжүүлэгчийн үүргийг гүйцэтгэдэг.
Нэгэн судалгаагаар, 2 мг/мл-ийн концентрацитай этанол нэмэхэд метан хийн үйлдвэрлэл 10.9 дахин, устөрөгчийн үйлдвэрлэл 3.1 дахин нэмэгдсэнийг тогтоожээ.
Судалгааны үр дүнгээс үзэхэд идэвхжүүлсэн нүүрсний био-задрал нь метаны өсөлтийн 75-84%-ийг бүрдүүлсэн гол хүчин зүйл байжээ. Этанол нь микробын нүүрсний давхаргын метаны системд био-идэвхжүүлэгч болж ажилладаг. Энэ нь нүүрсний био-задрал болон устөрөгчийн үйлдвэрлэлд оролцдог микробын бүлгүүдийг баяжуулж, улмаар метан үүсэх процессыг (methanogenesis) дэмждэг байна.
Метан хийн гарцын энэхүү өсөлт нь тус салбарын төслүүдийн эдийн засгийн үр ашигт үлэмж эерэг нөлөө үзүүлэх тооцооллыг гаргасан байна. Түүнчлэн нүүрсний уурхайнуудад дараах боломжууд нээгдэж байна. Үүнд:
• Ирээдүйд нүүрсний уурхайнуудыг зогсонги байдалд оруулахын оронд MECBM үйлдвэрлэх "био-үйлдвэр" болгон хувиргах боломжтой.
• MECBM-ийн давуу тал нь түүний үндсэн бүтээгдэхүүн болох метан хий нь химийн бүтцийн хувьд байгалийн хийтэй яг ижил байдагт оршино. Компаниуд эрчим хүч тээвэрлэх шинэ сүлжээнд хөрөнгө оруулахын оронд одоо байгаа хийн хоолойнуудыг шууд ашиглах боломжтой.
Дэлхийн био-хий болон био-метан хийн үйлдвэрлэл 2030 он гэхэд 2023 оны түвшнээс 1.6 дахин өсөх төлөвтэй байна. Хэдийгээр гарцыг 10.9 дахин нэмэгдүүлсэн нь техникийн хувьд боломжтойг харуулж байгаа ч үйлдвэрлэлд нэвтрүүлэхэд дэд бүтцийг хөгжүүлэх, үйл ажиллагааг оновчтой болгоход хугацаа шаардагдана.
Этанолын био-идэвхжүүлэлтийг арилжааны зорилгоор үйлдвэрлэлд нэвтрүүлэхдээ эхэн үедээ олборлох боломжгүй нүүрсний давхаргууд эсвэл ашиглагдахаа больсон уурхайнуудад нэвтрүүлэх магадлалтай байна.