Тус салбарын үйл ажиллагаа зөвхөн уурхай, орд газруудын олборлолтоор хязгаарлагдахгүй. Манай улсын эдийн засаг, төсөв, экспорт, орон нутаг, байгаль орчин, иргэдийн амьдралтай олон талаар холбогддог. Тиймээс уул уурхайн салбарт болж буй үйл явдлыг мэргэжлийн түвшинд, бодит мэдээлэлд тулгуурлан олон нийтэд хүргэх хэрэгцээ чухал байр суурь эзэлдэг. Энэ талаар “Эрдэс баялгийн тойм” сонины ерөнхий эрхлэгч Гонгорын Идэрхангайтай ярилцлаа. Тэрээр энэхүү ярилцлагын хүрээнд уул уурхайн чиглэлийн хэвлэл мэдээллийн нэг гол үүрэг нь салбарын үйл явдлыг баримтад тулгуурлан мэдээлж, мэргэжлийн хүмүүс болон олон нийтийн хооронд мэдээллийн гүүр болох явдал юм гэдэг түлхүүр санааг онцолсон юм. Энэ санаа нь түүний хувьд тодорхой салбарын чиглэлтэй сонин гаргах үндсэн шалтгаануудын нэг болжээ. Хэвлэл мэдээллийн байгууллага аливаа асуудлын нэг талыг барьж тайлбарлах бус, холбогдох талуудын байр суурийг хүргэж, баримт мэдээллийг нээлттэй болгож чадвал үл ойлголцлыг багасгахад тодорхой хэмжээгээр хувь нэмэр оруулах боломжтой юм. Үүний үр дүнд иргэд тухайн асуудлыг илүү зөвөөр ойлгож, хандлага нь өөрчлөгддөг. Мэдээ, мэдээллийг хурдан шуурхай хүргэхээс илүү тухайн мэдээллийн цаадах агуулгыг зөв ойлгож, мэргэжлийн эх сурвалжид тулгуурлан, уншигчдад ойлгомжтой хэлбэрээр хүргэх нь уул уурхайн чиглэлийн хэвлэл мэдээллийн онцлог юм. Г.Идэрхангай эрхлэгчийн “Уул уурхайн салбарын мэдээлэл нэг цонхоор явах ёстой” гэсэн байр суурь ч үүний илэрхийлэл мөн.